Ferran Adrià edo Andoni Luis Adurizen sukaldeetan jardun ondoren, buru-belarri lan egin zuen Paco Moralesek, panorama gastronomikoan bere lekua aurkitu arte, eta bere jaioterrian, Kordoban, aurkitu zuen leku hori, Cañero auzo xumean. Hantxe ireki zuen Noor jatetxea, non bezeroei sukaldaritza andalustarraren mundu goxoa hurbiltzen dien. Rosa Tovar historiagilearekin batera, arabiar errezetak eta Al Andaluseko kulturaren jatorriak ikertu zituen.

Horren emaitza sukaldaritza berezi bat da, zeinetan historiarekin eta zaporearekin jolasten duen; sukaldaritza horretan, ez daude beranduago Ameriketatik penintsulara iritsiko ziren eta gaur egun dieta mediterraneoan ohikoak diren produktuak, patata, tomatea eta kakaoa, adibidez.

Paola Gualandi gazte italiarra da Moralesen eskuineko eskua abentura historiko-gastronomiko honetan. Istituto Statale Istruzione Superiore G.D Romagnosi (Erba) ikastetxean trebatu zen, eta hiru jatetxetan eta gozotegi batean egin zituen praktikak El Coq (Vicenza) jatetxera iritsi baino lehen. Jatetxe horretako chefak ziurtatu zizkion praktikak Noor jatetxean, eta berehalakoa izan zen Pacorekin izan zuen konexioa.